Kuv Niam Zaj Keeb Kwm





Txoj kev ntsuag, sawv daws yeej khiav tsis dhau. Peb yug los ua neeg nyob, peb paub hnub no xwb, tag kis zoo li ib zaj dag neeg ua tsis tau muaj tus cwj mem los sau. Kuv yog kuv niam tus ntxhais, noj kuv lub niam lub mis loj hlob. Hnub no, lub meej mom poob los rau kuv los sau kuv niam zaj keeb kwm.

        Kuv niam, Dawb Vaj, Niam Nyiaj Vaj Lauj, yug rau lub 8 hli tim 15 xyoo 1947 nyob rau lub zos Os Lav, qab xamnum. Kuv niam muaj tshib tug viv ncaus, Yias, KabYeeb, Tshau, Yiv thiab Tsab Mim. Kuv niam muaj plaub tug nus, Txhiaj Caw, Tsab, Tswj Tooj, thiab Txawj Thoj. Niam hu uas Poj Sua Lis, txiv hu uas Nom Pov los yog Paj Zeb Vaj.

        Loj hlob, kuv niam nyiam txoj xov paj ntaub uas kuv nyiam coj los ua ib qhov phuav pheej tseg rau peb cov nus muag. Muaj ntau zaus hauv kuv lub neej, kuv yeej pom kuv niam zaus ntawm lub qhov rais, txais tes los xaws paj ntaub rau ib txoj hlab sev kom kuv thiab kuv cov vic ncaus zoo nkauj xws teb xws chaw. Qhov kuv niam  xaws paj ntaub no yog kuv niam pom luag tej txawj xaws, muaj txoj kev ntshaw, rov los kawm kom tau ib qhov kev txawj ntse. Peb Hmoob zaj kwv txhiaj seev suab yog kuv niam ib txoj kev ntshaw los hais rau sawv daws hnov. Thaum kuv loj hlob tiav nkauj, kuv tau hnov kuv niam seev suab ib zaug.

        Kuv niam los yuav kuv txiv rau lub xyoo 1970. Kuv niam hais tias qhov kuv niam nyiam txog ntawm kuv txiv tshaj yog qhov kuv txiv txawj neeb thiab kuv txiv txoj kev zoo nraug paub deev kuv niam lub siab nrog peb Hmoob cov lus zoo. Ua neej ntev npaum li no ua kev, kuv niam pom qhov zoo txog ntawm kuv txiv xwb. Lub neej ua ke kuj sov siab vim kuv niam tau ib lub hwj chim los ua 10 leej me nyuam niam. Kuv niam cov tub yog Tswj Yeej, Tsav Zeb, Kiab Toom, Pob Tsuas, Npliaj Nus, thiab Nuj Loob. Cov ntxhais yog Neeb, Oo, Huab, thiab Jenny. Cov me nyuam no pom, paub, thiab hlub leej niam lub xub ntiag ib yam nkaus.

        Los rau xyoo 2001, kuv niam tau muaj ib tug kab mab rau kuv niam lub hlwb ua kuv niam lub cim xeeb ploj tag nrho. Lub sij hawm ntawm, yog koj saib hauv kuv niam ob lub qhov muag, tus neeg ploj tag, muaj ib tug neeg tsis nco dab tsi los sawv ua nws cev. Peb cov me nyuam txhua tus ntshia heev. Khws kho mob tau hais tias yog pab los, 50 feem puas tej zaum nej niam yuav tsis nco nej. Tab si, kuv niam yog ib tug txoj hmoo sawv zoo heev vim kho tag kuv niam rov los ua peb niam. Tsis yog mob ib zaug xwb, tseem yog ob zaug rau tus mob no. Kuv niam lub siab yog ib lug siab ua muaj zog thiab loj tshaj. Txawj muaj mob npaum twg los nws lub suab luag yeej tsis ploj mus. Koj mus xyuas thaum twg los kuv niam yeej luag ntxhi xwb. Qhov peb cov me nyuam nco thiab tsuas tshaj plaws yog kuv niam lub suab luag. Kuv niam muaj ib lub suab luag uas tos koj paub xwb koj twb nrog nws luag yam koj tsis paub yog vim li cas.

        Poob los rau xyoo no, kuv niam tau ib tug mob phem heev. Nws tsis zoo li txhua zaus uas khws kho mob yuav tso siab tias yuav kho tau rov los ua peb niam. Thaum peb cov me nyuam hnov, sawv daws yeej tu siab tias txhua zaus hnov tias yog luag xwb, zaum no yuav poob los rau peb cov nus muag. Txoj kev ntsoj ntsuag peb yuav tau ev tiag tiag. Hnub tim 19 lub 11 hli thaum 3:07 sawv ntxov, peb cov me nyuam nrog rau kuv niam ob tug nus pom kuv niam txoj sia tu nrho nrog ib lub kua muag poob los ntawm kuv niam lub qhov muag.  

        Thaum kuv niam nkees nkees, sawv daws kuj tau tuaj saib, tuaj hlub, nrog kuv niam nyob tham ob peb lo lus. Qhov no yog kuv niam txoj kev zoo siab tshaj vim kuv niam pom tias sawv daws tseem muaj ib lub siab nco txog kuv niam thiab. Lub aisthiv ua ntej kuv niam tso peb tseg, kuv tau tuaj nrog kuv niam nyob tham txog kuv niam lub neej. Kuv niam tau hais ob peb lo lus tseg rau kuv kom kuv muab sau cia los nyeem rau kuv cov nus muag tau hnov. Kuv los txog tsev, kuv muab xav ntau tias yuav sau li cas thiaj li yuav zoo. Thaum kawg, kuv txiav txim siab tias kuv yuav tau ua kuv niam lub suab thiaj li muab kuab. Yog li, kuv cov nus muag, nej mloog kuv niam cov lus rau peb sawv daws mog.

        Kuv ib sab tes yeej ib txwm tsis muaj zog heev. Kuv muaj ib sab tes los khws xwb los kuv yeej tsis pub kuv tej me nyuam txom nyem. Yeej tsis pub kuv tej me nyuam pom tias mob kuv npaum twg. Luag txawm yuav thuam kuv npaum twg los kuv ua twj ywm txhais tej lus cia es muab faus cia rau ib qhov kom txhob mob kuv siab xwb. Kuv muab luag qhov zoo coj los saib thiab coj los hlub. Es luag yuav cem kuv li cas los kuv tu siab twj ywm xwb. Qhov no tsis yog kuv ruam mog kuv cov me nyuam, nws yog tias kuv lub siab loj tshaj es kuv zam txim rau lawm tag nrho xwb.

        Kuv cov me nyuam, txhua zaus es nej hnov tias yog luag tej niam thiab txiv nkees xwb, es zaum no, yuav yog nej. Kuv lub cev thiab lub siab yeej tsis tau tus kab mob es ntshe nej cov me nyuam tsis xav ris lub npe ua ntsuag los tej zaum, nej yuav tau ev. Tiam sis, thov nej nco kuv tej lus cia. Es txawm tias kuv muab tsis tau dab tsi rau nej los, kuv muab kuv cov lus rau nej khaws cia tseg tias yog nej niam hais tseg. Kuv yeej ib txwv tsis txawj ntawv es kuv txawj paj ntaub xwb. Kuv muab kev tej me paj ntaub uas kuv ob txhais tes los xaws rau nej khaws cia saib ua dab muag tias ib zaug los ua neej ua ke es kuv ua nej niam muab dab tsi rau nej.

        Kuv tsis xav tau dab tsi. Kuv xav thov kom nej sawv daws ua kom tau ib lub ntees zoo rau kuv xwb. Es kuv thov kom nej tsis txhob ua li teb chaws. Niam txiv tuag tas es yuav sib txeeb nyiaj txiaj. Kuv muaj viv ncaus thiab nus tsawg tsawg kuv twb tu siab tias tsis muaj leej twg los hlub. Thov kom nej cov me nyuam txawj sib hlub pau qhov kuv txom nyem xwb ces kuv zoo siab qi muag luag ntxhi. Kuv muaj kev tu siab ntau yam heev. Qhov kuv tu siab no yog qhov tias kuv tsis muaj lub peev xwm los ua li kuv txoj kev npau suav, txoj kev ntshaw. Hnub no, kuv hais ib lo rau nej tias cia txoj ke tu siab tag rau kuv nawb. Nej nyiam dab tsi, ntshaw dab tsi, los yeej meem ua kom tau tag nrho. Cia kuv ib leeg thiaj li yog tus tu siab xwb. Cia txoj kev tu siab ploj kom tag nrog kuv mus.

        Kuv thov kom nej sawv daws nco tias nej los qhov twg los. Nco hais tias yog muaj koj txiv thiab kuv es nej thiaj li luaj li no. Muaj ib hnub twg nej sawv los lub vaj lub tsev yuav ntsiag to. Nej yuav nrhiav qhov twg los tsis pom kuv, tsis hnov kuv lub suab luag, tsis hnov kuv nthe nej. Kuv los koom nej li tej me kab me ntsaum lawm xwb. Yog nej pom tej me kab me ntsaum hauv tsev no ces txhob muab pov tseg. Nws yog kuv xwb. Nej ua neej nyob, yog tias tsev sw, mov tsis muaj  no, nco tias yog kuv niam nyob ces ntshe kuv niam twb cem kom tu tsev ua mov noj. Kuv yeej yog ib tug neeg hais lus nrov tab si, kuv hais nrov los kuv hais nrog kev zoo xwb. Ntshe hnub twg vaj tsev ntsiag to lawm, nej yuav xav kom hnov kuv lub suab nrov los yuav thov ntuj teb tsaus nti tsis hnov nrov lawm.

        Kuv lub neej kuv yeej txom nyem vim luag saib kuv yam tsis paub tab. Tab si, qhov no yog qhov nej yuav nco, qhov nej yuav seev, qhov nej yuav nrhiav tsis muaj ib tug neeg hauv ntiaj teb muaj. Nej niam ib leeg thiaj li zoo li no xwb. Nco tias ib leej niam muaj tau kaum leej me nyuam, tab sis, kaum leej me nyuam muaj tau ib leej niam xwb.

        Kuv tej me nyuam, kuv lub kua muag tu siab yuav tsis poob lawm yog nej cog lus tias nej yuav nco kuv tej lus, nco thaum kuv plhws nej tej me taub hau, nco kuv txiaj ntsig, thiab sib vam ces kuv txoj hauj lwm tag rau ntiaj teb no. Kuv paub tias txawm kuv tsis txawj ua lwm yam ntau los kuv txawj los ua ib leej niam rau nej xwb ces kuv yuav zoo siab lug. Hnub twg tsis muaj kuv lawm no, khaws kuv tej duab zoo cia es yog hnug twg nco kuv no los muab coj los saib seb nej ho puas yuav pom kuv luag rov qab rau nej.

Comments

Popular posts from this blog

50 Shades Darker

Kuab Muaj Tsuas 2 Review

Majurat See Nam Pueng